Өмірзақ Шөкеевтің төрағалығымен 25 ірі инвесторлардың қатысуымен Түркістан облысы инвесторлары Өңірлік кеңесінің онлайн отырысы өтті. Оған тиісті ұйымдардың басшылары, Италияның Қазақстандағы Елшісі Паскуале Д’Авино және HEVEL КТ, «Artel Electronics», «ECOINVEST» ЖШС, Ынтымақ Агро ХХІ секілді шетел және еліміздегі алпауыт компаниялардың басшылары қатысты. Облыс басшысы басқосуға қатысқан әр инвестормен жеке сөйлесіп, олардың бизнес – жобалары жайлы талқылады. Өңірдегі инвестициялық ахуалды жақсарту мен инвестиция тарту және осы бағыттағы жұмысты жетілдіруге тоқталды. «Сіздер бізді өз үйлеріңіздей көріңіздер. Ол үшін қолдан келген барлық жағдайды жасаймыз. Біздің инвесторлар – нағыз патриоттар. Барлық инвесторларға өңіріміздің дамуына қосқан елеулі үлестері үшін алғыс айтқым келеді. Облысымыз жаңа, өздеріңіз білетіндей, өңіріміздің құрылғанына 3 жыл енді болады. Біздің басымдықтарымыз – бұл, ең алдымен, туризм, энергетика, қайта өңдеу, көлік-экономиканы әртараптандырумен байланысты барлық саланы қамту. Және бұл осы бағытта қолға алынған тірліктің бастамасы ғана», – деді Өмірзақ Шөкеев онлайн-конференцияда. Өткен жылдың қорытындысы бойынша Түркістан облысы бизнесті жүргізу жеңілдігі рейтингінде еліміздің үздік өңірі деп танылды. Сондай-ақ облыс өңір инвестициялардың (+60%) және құрылыстың (+66%) өсу қарқыны сияқты көрсеткіштер бойынша абсолюттік көшбасшы болып табылады. Құрылған сәттен бастап Түркістан облысында 600 млн. АҚШ долларын құрайтын 91 жоба жүзеге асып, шамамен 6 мыңдай жұмыс орны құрылды. Алдағы төрт жылда 1,5 трлн. астам сомаға 93 жобаны іске асыру күтілуде. Осылайша келешекте 21 мың адамды жұмыс орындарымен қамтамасыз етіледі. «2021 жылдың соңына қарай 306 млрд. теңгенің 62 жобасы іске қосылады деп күтілуде. Осылайша 3 802 адам жұмыспен қамтамасыз етіледі. Шетелдің қатысуымен 1071 жұмыс орнын құрумен 164,1 млрд. теңге сомасына 12 жобаны пайдалануға беру жоспарлануда», – деп мәлімдеді облыс әкімінің орынбасары Мейіржан Мырзалиев. Оның айтуынша, инвестициялардың негізгі үлесі туризмді, жаңартылатын энергия көздерін (ЖЭК), өңдеу өнеркәсібі мен АӨК-ні дамытуға бағытталатын болады. Айта кетейік, Түркістан облысы жаңартылатын энергия көздері саласында айтарлықтай ресурстық әлеуетке ие. Өңір электр энергиясын нетто-импорттаушы болып табылады және өзінің қуаттылығы есебінен жалпы қажеттіліктің 20%-ын жаба алады. Қазіргі уақытта өндірілетін электр энергиясының барлық көлемі ЖЭК-ке тиесілі (97%).Сонымен қатар, туризм саласын дамыту – Мемлекет басшысы алға қойған негізгі міндеттердің бірі. Қазіргі уақытта туристік ағын 1,5 млн. адамды құрайды, таяу жылдары өңірге келген саяхатшылар қатары 5 миллионға жетеді деп күтілуде. Туристік инфрақұрылымды жетілдіру үшін өткен жылы 11,7 млрд. теңге сомасына 321 жұмыс орнын құрумен 12 жоба іске асырылды. Ең ірі жобалар – Rixos Turkistan және Hampton by Hilton қонақ үйлері. Сонымен қатар, ағымдағы жылы 120 млрд. теңгенің 1 мыңнан астам жұмыс орындарын құруға бағытталған 20 жобаны іске қосу күтілуде. Олардың қатарында өңірдің ең ірі жобаларының бірі – «Керуен Сарай» көпфункционалды туристік кешені бар. Сондай-ақ, алдағы екі жылда «Қасқасу» туристік-рекреациялық орталығын салу жоспарлануда.Бұдан басқа, өңдеу өнеркәсібі салаларына шетелдік инвестицияларды тартуға баса назар аударылды. Облыста химия, тамақ, жеңіл өнеркәсіп және машина жасау белсенді дамуда. 2020 жылы өнеркәсіп саласында 7,5 млрд. теңге сомасына 21 жоба іске асырылып, 2 мың жұмыс орнын құрды. Соның ішінде шетелдің қатысуымен 500 млн. теңгеге жоба іске қосылды («Turkistan textile» ЖШС тігін фабрикасы). Ірі инвесторлар облыс басшылығына және «TURKISTAN INVEST» РАПИРЭ жобасын іске асыруға көрсетілген көмегі үшін алғыс айтып, фронт-офис пен әкімдіктің үйлесімді жұмысын атап өтті. Өз кезегінде Өмірзақ Естайұлы инвесторлардың облыстың кәсіпкерлік саласындағы жетістіктеріне қосқан зор үлесін атап өтіп, одан әрі жемісті ынтымақтастыққа сенім білдірді. Сондай-ақ ірі серіктестермен өзара іс-қимылдың даму барысын жіті қадағалайтынын және туындайтын мәселелерді шешуге және жобаларды іске асыруға барынша жәрдем беретінін айтты.
![](http://dingek.kz/wp-content/uploads/2021/03/111.jpg)