Ақтөбе қаласының жастар ресурстық орталығының ұйымдастыруымен 2024 жылы қала жастарының бойында патриотизмді насихаттау, мұқтаж жандарға қол көмегін беру мақсатында 20 рет «Ардагерлерді ардақтайық» акциясы өткізілді. Ардагерлерге, жалғызбасты қарияларға, үлкен кісілерге әрдайым қол ұшын созу, олардан өнегелі тәлім тәрбие алу және сала ардагерлерін кеңінен насихаттауды мақсат еткен бірегей акциясы бүгінде қала жастары белсенді атсалысуда.
Атап айтсақ, ақтөбелік жастар ардагерлердің үйіне барып, тұрақты түрде мекенжайлық көмек көрсетіп келеді. Еріктілер үй сырлау, әктеу, аула тазалығын жасау, қыс мезгілінде қар тазалау секілді тағы басқа жұмыстарды жүйелі жүргізіп келеді. Өскелең ұрпақтың өнегелі қарттарға, мұқтаж жандарға жәрдемдесуге әзір екені көңілге қуаныш ұялатады. Биылғы жылы да қалалық жастар орталығының ұйымдастыруымен жауапты да сауапты жұмыстар жалғасын таппақ.
Dingek.kz
