Ескерткіште сонымен қатар Шерхан ағамыздың суреті мен туған жылы, тағылымды ойлары жазылған. Сондай-ақ Алаштың алдаспанын ту еткен қайраткердің тұрған үйге де ескерткіш тақта қойылды. Ескерткіш тақтаны да Түлкібас ауданының әкімдігі жасап, атсалысты. Даласы бауымен астасып, өзен-көлімен ұштасып жатқан киелі өлке Түлкібас ауданынан бір топ азаматтар Ш.Мұртаза ағамыздың жылдық асына барып, өнегелі іс жасап, қарымды қаламгерге құрмет көрсетті. Қазақ тарихында халықтың Шерағасы деген атқа ие болған Шерхан Мұртаза жайлы Түлкібастықтар М.Мырзахметұлы, ҚР Парламент мәжілісінің депутаты Д.Мыңбай басқа да жазушылар мен ақындар, қайраткерлер кейінгі ұрпаққа рухани бай мұрасын қалдырған қаламгер жайлы естеліктер айтты.
Қайраткерлігі мен қаламгерлікті қатар алып жүріп, кесімді пікір айтып, ұлттық рухтың жаршысы болған Ш.Мұртаза туған жері Жуалы ауданы кеңес үкіметі кезінде Түлкібас ауданымен бір аудан болған. Қос ауданға ортақ тұлға Шерхан ағамыз Жуалыға келгенде Түлкібас ауданына ат басын бұрып, елмен кездесіп, бір қауышып қайтатын. Сондықтан болар Ш.Мұртаза Түлкібас ауданы жайлы «Түлкібас –тұлпарлар туған жер, сұнқарлар қонған жер» деген теңдеу берген.
