![](http://dingek.kz/wp-content/uploads/2022/03/2022_03_06_17a26f2f-923b-4efd-bd7e-82ed3de078be-960x500-1.jpeg)
Қазақстандық 30-дан аса оқушы АҚШ-қа жолдама жеңіп алып, FIRST Alumni мәртебесін иеленді. Аталған мәртебе оқушыларға әлемнің 200 беделді университетінің біріне оқуға тапсырса, грантқа өтуіне артықшылық береді. Қазақстан атынан іріктелген команданың бұл мүшелері енді халықаралық сайыста жүлдеге таласады.
Жолдама оқушыларға робототехникадан FIRST халықаралық чемпионатының ұлттық финалы қорытындысы бойынша берілді. Ұлттық жарысқа Қазақстанның түкпір-түкпірінен 700-ден аса оқушы қатысты. Нәтижесінде, 4 оқушы Сүлейман Демирель атындағы университетте оқуға мүмкіндік беретін грант ұтып алды. Сонымен қатар чемпионатқа қатысқан 10 команда Мәскеу қаласындағы FIRST жарысына, ал Красноярск қаласына 6 команда аттанады.
Қазақстандағы FIRST робототехника бойынша халықаралық жарысының ұйымдастырушысы Нұрдәулет Досмағамбет: «Биыл қатысушылар «Жүк тасымалы» тақырыбы бойынша тапсырмалар орындады. Сондықтан оқушылар өздері ойлап тапқан шағын жүктерді тасымалдайтын, тауарларды сұрыптайтын және кедергілерді айналып өтетін роботтарды таныстырды. Чемпионаттың қорытындысы бойынша төрт команда АҚШ-қа жолдама жеңіп алды. Бұған қоса Алматы, Семей және Түркістан облысынан 4 оқушы білім гранттарын жеңіп алды. Чемпионатқа еліміздің шағын ауылдары мен қалаларынан келген мектеп оқушыларын атап өткім келеді. Бұған дейін Түркістан, Қызылорда және Шығыс Қазақстан облыстарында, Ақмола облысының Атбасар қаласында мектеп оқушылары мен мұғалімдеріне робототехникадан тренингтер мен жарыстар өткізіп, балалар мен оқытушылардың қызығушылығын көрдік. Олар чемпионатқа келіп, білім жағынан үлкен қалалардың оқушыларынан кем түспейтініне көз жеткізе алды», дейді.
Оқушылар ғана емес, мұғалімдер де ынталандырудан құралақан қалмапты. 6 мұғалім Best Mentor Award номинациясы бойынша FIRST марапаттарына ие болды. Осы марапатты алғандардың бірі Әсем Қасым Қарағанды облыстық дарынды балаларға арналған мамандандырылған «Дарын» мектеп-интернатында информатика мен спорттық робототехникадан сабақ береді.
Білім және ғылым министрлігі оқушылар мен мұғалімдер қатысатын олимпиадалар тізіміне FIRST чемпионатын енгізген. Жыл сайын FIRST жарысының ұйымдастырушылары 6 мен 18 жас аралығындағы балалар арасында түрлі байқаулар өткізеді. Әр сайыс тақырыбы және тапсырмалардың күрделілігімен ерекшеленеді. Тапсырмалар нақты әлемдік мәселелермен байланысты, атап айтқанда, өнеркәсіпті автоматтандыру, тау-кен өндіру, қалдықтарды өңдеу, ғарышты зерттеу, биомедицина және басқа да маңызды тақырыптарды қамтиды.